Mar 13 | TGG | STEP | Aunbiing Iesu ka suuh tina Felun Sising, neng lon berberat na fafausum kia ka tara sing i aragii, “Tom fafausum, par foron rokap na fel igii ae ri tel ta u ini foron pirpiran fat.”

Mark 13

Iesu i use u le Felun Sising in Laulau

(Mt 24:1�2; Lk 21:5�6)

1 Aunbiing Iesu ka suuh tina Felun Sising, neng lon berberat na fafausum kia ka tara sing i aragii, “Tom fafausum, par foron rokap na fel igii ae ri tel ta u ini foron pirpiran fat.”

2 Iesu ka kiliis u aragii, “Gam par piran fel igii. Namih, biil mang in tikii e fat in borong na olon neng, rin rabat u ma rik lin sabalke u.”

Foron Fakileng na Farfarop na Biing

(Mt 24:3�14; Lk 21:7�19)

3 Aunbiing Iesu ka kiis bae na olon Pungpung na Olif ma ri ka par una Felun Sising, Pita, Jems, Jon ke Enru ri ka diik fakum u le, 4 “Fas kemem, nangis foron tier igii in tapiek? Ke matngan fakileng arafah in finngas u le foron tier igii, fatat rin tapiek?”

5 Iesu ka fas ri aragii, “Gamen tumarang, tarama tikas ka fabal gam. 6 In fuun rin la ini asang, rin tara le, ‘Iau e Mesaia’, ke rin fabal ifuun. 7 Aunbiing gam ongen fapaket ke babauus na foron fapaket, gong gam nangnangih, wara le foron tier ae in tapiek famu, isau le farfarop na biing biil biitom in tapiek. 8 Nenge mat in aptih isi fapaket turan nenge mat, ke nenge matanfuntih ik aptih ma ik fapaket turan nenge matanfuntih. Gih turan fitol in tapiek na fal e maleh. Foron tier igii i arae tanwaran fangungut ae nenge fifin i kalsakai u, aunbiing i fafang.

9 “Gam tumarang. Fanu rin ta ufu gam usuf foron tom nagogon ma rik pis gam awii na felun lotu. Gamen sotih na nagogon na matan piran famfamu ke foron king, i wara lo iau. Ke gamek famalal iau usuf ri. 10 Ma rin fafas famu ini Rokap na Fafas usuf foron mat tikii na piklinbat. 11 Aunbiing rin dat gam una nagogon, gong gam lala wol isi sanih gamen use u. Gamen use orek sau ae Tanwa Kalkaluu in fas gam ini na aunbiing ae, wara le biil e gam ae gamen orek, biil, Tanwa Kalkaluu tom.

12 “Nenge kaltu in somangat ufu tualik isi rik siimete u, ke nenge kaltu in somangat ufu ke kalalik isi rik siimete u. Berberat rin fapaket tura temri ke tinri ke rik somangat ufu ruh, isi fanu rik siimete ruh. 13 Ma fanu tikii rin ememse gam, i wara na asang. Isau le seh i tifat papang na farfarop, God in faliu u.

Fafanau isi nenge Tier Laulau in Tapiek

(Mt 24:15�28; Lk 21:20�24)

14 “Gamen par nenge tier ae i laulau kanaka in tapiek, in kiis na falifuh ae biil i tortores le in kiis lo. Seh i wes foron orek igii, i rokap le in malal ulo. Na aunbiing ae, fanseh ae ri kiis na nanal na Iudaia, rin fin una foron pungpung. 15 Male tikas tinbae na olon fel kia, ke aunbiing in puh, gong i kau isi kep fasuuh ti minmara kia. 16 Male tikas i foim na mok kia, gong sabin in fis una fel isi kep ti kilkiliis kia. 17 Na foron aunbiing ae in laulau kanaka usuf foron tian, ke usuf kelefin sabin ae ri fasfasus. 18 Gamen sising isi foron tier igii gong i tapiek na foron funiil ae falifuh i mir la. 19 Wara le foron biing ae, in laulau kanaka. In laulau kanaka na foron tatawin ae i tapiek la na piklinbat. Tipes u na aunbiing ae God i fakiis ta piklinbat papang igii, ma namih, biil sabin in mel e tatawin arae. 20 Male Kumguui biil in kiit fatukli ta aunbiing na tatawin, ke biil mang tikas in liu. Isau le i wol lon fanu ae ka tus pes ta ri ma ka somangat pes ta ri, pesu ka kiit fatukli aunbiing. 21 Na aunbiing ae, male tikas in fas gam le, ‘Gam par u! Igii e Mesaia!’ le ‘Ae e Mesaia,’ gong gam unune lo. 22 Foron mesaia famfabal ke foron poropet famfabal rin tapiek. Ke rik fatapiek foron fakileng ke foron tier an fabitit. Male ri fasih, ke rik fabal fanu ae God ka tus pes ta ri. 23 Pesu gamen tumarang, igii ia ka fas famu ta gam ini foron tier tikii ae in tapiek.

Kalalik ken Kaltu in Tapiek

(Mt 24:29�31; Lk 21:25�28)

24 “Na foron biing namih sau na tara tatawin,

‘matan pisiih in kubunor
ke funiil biil in popos,
25 foron keltot rin luut tinbae na bat,
ke foron tier tinbae na bat rin nut.’
26 “Na biing ae, fanu rin par Kalalik ken Kaltu in tapiek na laukaf ini tara rakrakai ke memeh kia. 27 Ma in wuun foron angelo kia isi rik tel turim fanu tikii ae i tus pes ta ri tina ifet e matan kif, tina nenge baban nanal papang na nenge baban nanal sabin.

Gamen Kep Usum tina Au na Fik

(Mt 24:32�35; Lk 21:29�33)

28 “Gamen kep usum tina au na fik. Aunbiing foron kubu i kuum ma foron awu ka tampalas, gam usum le foron funiil ae falifuh i tuntun la ka fatat. 29 Ke aunbiing gam par tier ae ia use ta u in taptapiek la, gamen usum le aunbiing ka fatat, ae mang na matanfel. 30 Tekentu kanaka ia fas gam, foron tier tikii igii in tapiek aunbiing fanu na ulul igii rin liu biitom. 31 Kukulii ke piklinbat run mangmangal, isau le foron orek kiak biil in to mangmangal.

Biil tikas i Usum na Biing ke na Aunbiing

(Mt 24:36�44)

32 “Biil tikas i usum na biing ke na aunbiing ae. Foron angelo buuii na kukulii ke Kalalik sabin biil ri usum, Tata sau i usum. 33 Gamen tumarang! Ke gamek geges! Wara le biil gam usum le nangis tom in tapiek. 34 I arae nenge kaltu ae i geges isi in la una nenge maleh. Ka ta fel kia usuf foron fafauun kia, isi rin fofonoi lo. Ka tem foron foim usuf temtem tikii lo ri, ke ka fas tom parpar kale matanfel le in parpar rokap na matanfel.

35 “Pesu, gamen tumarang, wara le biil gam usum na aunbiing ae taman fel in tapiek. In tapiek na efef, le na tara wor, le na aunbiing to in teng, le na biingbiing. 36 Tarama ka fabitit gam, ma ka tafe gam aunbiing gam gok. 37 Ia fas fanu tikii ini sanih sau ia ka fas ta gam ini le, gamen tumarang.”